சாதுர்மாஸ்ய வ்ரதம் (05.07.2020 – 30.11.2020)

இந்து சமயத்தில் சாதுர்மாஸ்ய வ்ரதம் என்பது துறவிகள் மழைக்காலமான ஆடி மாத பௌர்ணமி முதல் கார்த்திகை மாத பௌர்ணமி வரை, நான்கு மாதங்கள் ஒரே இடத்தில் தங்கி, வேத வேதாந்தங்களை மக்களுக்கு எடுத்துச் சொல்வார்கள். இந்த மாதங்களில் துறவிகள் உணவு முறையில் சில கட்டுப்பாடுகளை வகுத்துக் கொள்வார்கள். முதல் மாதம் உணவில் காயும் பழங்களும் இருக்கும். இரண்டாம் மாதம் பால் தவிர்ப்பார்கள். மூன்றாம் மாதம் தயிரை தவிர்ப்பார்கள். நான்காம் மாதம் பருப்பு வகைகளைச் சேர்த்துக் கொள்ள மாட்டார்கள்.

துறவிகள், வெளியூர்களுக்குச் சென்றால் ஓர் இரவுக்கு மேல் தங்கக் கூடாது. அதிகபட்சம் மூன்று நாள் தங்கலாம் என்றாலும், மழை மாதத்தில் ஒரே இடத்தில் நான்கு மாதங்கள் தங்கி இருக்க வேண்டும் என்கிறது சாஸ்திரங்கள். ஏனெனில், மழைக் காலத்தில்தான் பூச்சி, புழுக்கள் உட்பட ஊர்வனவை வெளியில் வரும். அவற்றைத் தெரியாமல் காலால் மிதித்துக் கொன்றுவிடும் பாவத்தைக் கூட துறவிகள் செய்யக்கூடாது என்பதற்காகவே இந்த விதிவிலக்கு.

இல்லறத்தார், சாதுர்மாஸ்ய விரதம் மேற்கொண்ட பீடாதிபதிகள் ஒருவரையாவது இந்த நான்கு மாதத்தில் ஒரு முறையேனும் சென்று தரிசிக்க வேண்டும். த்வைதம், அத்வைதம், விசிஷ்டாத்வைதம் ஆகிய கோட்பாடுகளை முறையே கைக்கொண்ட, ஆனந்த தீர்த்தர் என்ற மத்வர், ஆதிசங்கரர், ராமானுஜர் ஆகியோர் வழி வந்தவர்கள் அனைவரும் இந்த சாதுர்மாஸ்ய விரதம் மேற்கொள்வார்கள்.

அதிகாலை பிரம்ம முகூர்த்த நேரத்தில் (சூரிய உதயத்திற்கு 1 1/2 மணி நேரத்திற்கு முன்பு) எழுந்து குளித்த பிறகு, மங்கள ஆரத்தி செய்து அதன் பின்னர் ஈஸ்வர த்யானம் அதாவது நமசிவாய /நாராயண மஹாமந்திரத்தை ஜபம் செய்ய வேண்டும்.

 பிரம்மசரிய விரதம் அனுஷ்டித்தல் அவசியம்.

பின்வரும் நன்கு முக்யமான விதிமுறைகளை பின்பற்ற வேண்டும்:-

(1) மது அருந்தாமை

(2) தகாத பாலுறவில் ஈடுபடாமை

(3) மாமிசம் உண்ணாமை

(4) சூதாடாமை

உங்களுக்குப் பிடித்தமான உணவு வகையினை இந்த மாதங்களில் கைவிடுதல் நன்று. நல்ல உடல் ஆரோக்கியம் இருந்தால், தினசரி ஒருவேளை மட்டும் சாப்பிடுவதற்கு முயற்சி செய்யுங்கள்.

விரத காலங்களில் அசைவம் உண்ணக்கூடாது 

சிரவண மாதத்தில் (ஆவணி மாதம்) கீரை உண்ணக்கூடாது. 

பாத்ர மாதத்தில் (புரட்டாசி)தயிர் உண்ணக்கூடாது.

ஆஸ்வின மாதத்தில் (ஐப்பசி)பால் அருந்தக் கூடாது. 

கார்த்திக மாதத்தில் மீன், மாமிசம், மற்றும் இதர அசைவ பொருட்களை மற்றும் மசூர் பருப்பும் உளுத்தம் பருப்பும் உண்ணக் கூடாது.

துளசி தேவிக்கு தினமும் ஆரத்தி செய்து கீர்த்தனம் பாடி ஸ்ரீமன் நாராயணனை முறைப்படி பிரார்த்தனை செய்யவும்.

தூய பக்தர்களுக்கு தானம் வழங்குதல் நன்று.

தினமும் சுவையான பதார்த்தங்களைப் படைத்து பரமாத்மாவான ஸ்ரீ கிருஷ்ணருக்கு நைவேத்தியம் செய்யுங்கள்.

விஷ்ணு சஹஸ்ரநாமம், ஸ்ரீமத் பாகவதம், ஸ்ரீ குரு சரித்ரம், ஸ்ரீமத் ராமாயணம், ஸ்ரீமத் சுந்தரகாண்டம், ஸ்ரீ ருத்ர   பாராயணங்கள், அதி விசேஷம் மற்றும் பல மடங்கு புண்ணியம் அளிக்கும். ஸ்ரீமன் நாராயணன் தரிசனம் நிச்சயம் கிடைக்கும். நம் நாடு முழுவதும் சாதுர்மாஸ்ய வ்ரத காலத்தில் ஆயிரக்கணக்கான இடங்களில் பாகவதம் படிக்கப் படுகிறது. பாகவத ஸப்தாஹம் நடத்தப் படுகிறது.

ஆயிரம் விஷ்ணு நாமங்கள் ஒரு ராம நாமத்துக்கு சமம் என்றும், மூன்று ராம நாமம் ஒரு கிருஷ்ண நாமத்துக்கு சமம் என்றும் சாஸ்த்திரங்களில் கூறப்பட்டு உள்ளது. (ஸ்ரீமத் பாகவதம் 1.19.6).

நாமும் இந்த சாதுர்மாஸ்ய விரதத்தை அனுஷ்டித்து ஸ்ரீமன் நாராயணனின் அனுக்கிரஹம் பெறுவோம்.

ஓம் நமோ நாராயணாய !!!!