ஸ்ரீ ஸ்ரீ ராகவேந்த்ர ஸ்வாமிகளின் 426வது (1595-2021) அவதார தினத் திருவிழா - 20.03.2021 (சனிக்கிழமை)

கலியுகத்தில் மக்களை நல்வழிப்படுத்தி "ஸ்ரீ ஹரியே சர்வோத்தமன் வாயு ஜீவோத்தமன்" என்னும் த்வைத மத கொள்கையை ஆணித்தரமாக வலியுறுத்தி இப்பாரதம் கண்ட மிக சிறந்த புனித மஹானாக பிறந்து மந்த்ராலயம் என்னும் புனித க்ஷேத்ரத்தில் ஜீவனோடு ப்ருந்தாவனப்ரவேசம் செய்து மக்களின் இன்னல்களை அல்லும் பகலும் தீர்த்து ப்ரத்யக்ஷ குருவாக இந்த கலியுகத்தில் விளங்குகிறார். யதிகளிலேயே ஸ்ரேஷ்டர்.  முக்காலமும் உணர்ந்த அபரோக்ஷ ஞானி.

த்வைத மத குருமார்களில் ஸ்ரீ ஸ்ரீ ராகவேந்திர ஸ்வாமிகளுக்கு என்றும் தனி இடம் உண்டு. இன்றும் ஸ்ரீ ராகவேந்திர ஸ்வாமிகள் அதிகம் வணங்கப்படும் குருவாக உள்ளார்.

இவரின் பரம குரு (குருவின் குரு ) ஸ்ரீ ஸ்ரீ விஜயீந்திர தீர்த்தர்.இவர் ஆய கலை 64 நான்கிலும் வல்லவர். இவரின் பிருந்தாவனம் கும்பகோணம் சோலையப்பன் தெருவில் உள்ளது. இவரின் சிஷ்யர் ஸ்ரீ ஸ்ரீ சுதீந்திர தீர்த்தர். இவரின் சிஷ்யர் ஸ்ரீ ஸ்ரீ ராகவேந்திர தீர்த்தர். இதில் என்னவொரு விந்தை என்றால் இவரின் முந்தைய அவதாரமான ஸ்ரீ வ்யாசதீர்த்தரின் சிஷ்யர்தான்  ஸ்ரீ ஸ்ரீ விஜயீந்திர தீர்த்தர். அவர் ஸ்ரீ ராகவேந்திர தீர்த்தராக அவதாரம் புரியும் பொழுது ஸ்ரீ  விஜயீந்திர தீர்த்தர் இவரின் பரம குருவாகிறார். என்னவொரு விந்தை பாருங்கள். குருவே சிஷ்யனாக சிஷ்யனே குருவான விந்தை. நமது கற்பனைக்கும் எட்டாத அற்புதம்.

"தேவெரெந்தரெ திருப்பதி திம்மப்பனு...

குருகளெந்தரெ மந்த்ராலய ராகப்பனு..."

(எப்படி  தெய்வம் என்றால் திருப்பதி வெங்கடாசலபதியை குறிக்குமோ அதுபோல் குரு என்றால் ஸ்ரீ ஸ்ரீ ராகவேந்திர ஸ்வாமிகளை மட்டும்தான் குறிக்கும்)

"சங்கு கர்ணாக்ய தேவஸ்து பிரம்ம சாபாஸ்ய பூதலே

ப்ரஹ்லாத இதி விக்ஷ்யாதோ பூபாரக்ஷ பனே ரதஹ

ச ஏவ ராகவேந்த்ராக்ஷ யதிரூபேண சர்வதா

கலவ்யுகே ராமசேவா குர்வன் மந்த்ராலயே பவத்"

                                - ந்ருஸிம்ஹ புராணம்

ப்ரஹ்மலோகத்தில் விளங்கிய ஸ்ரீ சங்குகர்ணன் என்னும் தேவதை ப்ரஹ்மனின் விஷ்ணு பூஜைக்கு தாமதமாக பூ மற்றும் பூஜா த்ரவ்யங்களை கொண்டு வந்ததினால் ப்ரஹ்மதேவனால் சபிக்கப்பட்டு க்ருத யுகத்தில் ஸ்ரீ ப்ரஹ்லாதராகவும், துவாபர யுகத்தில் ஸ்ரீ பாஹ்லீகராஜாவாகவும், கலியுகத்தில் இரண்டு அவதாரங்கள் முறையே ஸ்ரீ  வ்யாஸராய தீர்த்தராகவும், ஸ்ரீ ராகவேந்திர தீர்த்தராகவும் அவதாரம் புரிந்து கற்பக வ்ருக்ஷமாகவும், காமதேனுவாகவும் என்றும் ஜீவனோடு விளங்கி மக்களின் அனைத்து வேண்டுதல்களையும் நிறைவேற்றுகிறார்.

தமிழகத்தில் தென்ஆற்காடு மாவட்டம் சிதம்பரத்திற்கு அருகில் உள்ள புவனகிரியில் திம்மண்ண பட்டர் - கோபிகாம்பாள் தம்பதியருக்கு பால்குணஸுக்ல சப்தமி திதி குருவாரம் மிருகசீர்ஷ நக்ஷத்திரத்தில் திருமலை வேங்கடவனின் திருவருளால் 1595 ஆம் ஆண்டு பிறந்தார். இவர் பிறந்தவுடன் அநேக சுப சகுனங்கள் தோன்றின.  இவரின் முந்தைய அவதாரமான ஸ்ரீ வ்யாஸதீர்த்தர் திருப்பதி வேங்கடவனை 12 ஆண்டுகள் பூஜை செய்யும் மஹாபுண்ணியம் கிடைத்தது. அதன் பலனால்தான் என்னவோ அந்த வேங்கடவன் அருளால் அதே வ்யாசராஜ தீர்த்தர்  தனது அடுத்த அவதாரத்தில் ஸ்ரீ ராகவேந்திர ஸ்வாமிகளாக பிறந்தார்.

"வருங்காலத்தில் மாஞ்சால கிராமம் உலக புகழ் பெற்றதாக அமையும். புகழ் பெற்ற ஒருவரின் ஜீவ சமாதியால் அது புகழ் பெரும்" என்று ஸ்ரீ ஸ்ரீ பாத ஸ்ரீ வல்லப சரிதாம்ருதத்தில் 20-ஆம் அத்தியாயத்தில் 13ஆம் நூற்றாண்டிலேயே இவரின் பிறப்பை பற்றி கணித்து கூறப்பட்டதென்றால் இவரின் அபார கீர்த்தி நமக்கு நன்கு விளங்கும்.

சாலிவாகன சகம் 1671 ஆம் ஆண்டு விரோதிகிருது வருடம், ச்ராவண மாதம், க்ருஷ்ணபக்ஷம், த்விதீயை,வியாழக்கிழமை ஸ்ரீ க்ருஷ்ண பரமாத்மா தனது கரங்களினால் பிடித்து ஜீவனோடு துங்கபத்திரா நதிக்கரையினில் அமைந்துள்ள ஸ்ரீ மந்த்ராலயம் என்னும் க்ஷேத்திரத்தில் பிருந்தாவன பிரவேசம் செய்தார்.

பூஜ்யாய ராகவேந்த்ராய சத்ய தர்ம ரதாயச |

பஜதாம் கல்பவ்ருக்ஷாய நமதாம் காமதேனவே ||

 

 

 

ஸ்ரீ தத்தாத்ரேயர் ஜெயந்தி - 29.12.2020

சப்த ரிஷிகளில் மிக ச்ரேஷ்டரான அத்ரி மகரிஷிக்கும் பதிவ்ரதா சிரோன்மணியான அனுஸுயா மாதாவிற்கு மும்மூர்த்திகளின் அம்சமாக பிறந்தவர் ஸ்ரீ தத்தாத்ரேயர். அத்ரி - அனுசுயா ஸத்புத்ரனை வேண்டி தவமிருக்க, அவரின் தவத்தில் மகிழ்ந்த இறைவன் "நானே என்னை கொடுக்கிறேன்' என்ற வாக்கியத்தின்படி 'தத்தாத்ரேயராக' அவதரித்தார். எப்படி அதிதி-கஸ்யபர் தம்பதியருக்கு வாமனராய், கர்தமர்-தேவஹூதி தம்பதியருக்கு ஸ்ரீ கபிலராய் தோன்றி அனுகிரஹித்தாரோ அதேபோல் அத்ரி - அனுசுயா தமபதிக்கு மும் மூர்த்திகளின் அம்சமாய் ஸ்ரீ தத்தாத்ரேயராய் தோன்றி அனுகிரஹித்தார்.

மார்கதரிசனம் குரு க்ருபையின்றி கிடைப்பதில்லை. குரு தத்தாத்ரேயர் ஒருவர்தான் மார்கதரிசனம் செய்விப்பவர். ஆகையினால் இவரது பிறப்பு மார்கழி (மார்க்க சீர்ஷ ) மாதத்தில் உண்டாயிற்று.

குரு பரம்பரை என்பது ஸ்ரீ தத்தாத்ரேயரிடம் இருந்துதான் ஆரம்பம்.

ப்ரஹ்மதேவனின் அம்சமான சந்திரன், விஷ்ணுவின் அம்சமான தத்தாத்ரேயன், சிவனின் அம்சமான துர்வாசன் என்று தங்களின் மூன்று அம்ச சக்திகளை அனுசூயாவிடம் அளித்தனர். இவர்களில் சந்திரனும், துர்வாசரும் தாயை நமஸ்கரித்து தவத்திற்கு செல்ல அனுமதி கோரினர். துர்வாசர் ரிஷி ஆனதால் தீர்த்த யாத்திரை செய்து தவம் செய்யவும், சந்திரன் தன்னுடைய லோகம் சென்று தன் தாயின் பாதங்களை தரிசித்து கொண்டிருக்கவும் விடை பெற்று சென்றனர். மூன்றாவது புத்திரன் விஷ்ணு மூர்த்தியான ஸ்ரீ தத்தாத்ரேயர்  அவர்களுடன் தங்கினார். "ஸர்வம் விஷ்ணுமயம் ஜகத்" என்ற வாக்கின்படி மூன்றுபேரும் சேர்ந்த தத்த மூர்த்தி குரு பீடத்திற்கு மூல புருஷராக விளங்கினார்.

குரு பரம்பரை என்பது ஸ்ரீ தத்தாத்ரேயரிடம் இருந்துதான் ஆரம்பம்.

தத்தாத்ரேய வழிபாடு மகாராஷ்டிரா மற்றும் கர்நாடகாவில் மிக மிக அதிகம். அதற்குக் காரணம் இந்த இரண்டு மாநிலங்களில் மட்டுமே தத்தாத்திரேய அவதாரங்களாக பல மகான்கள் இருந்துள்ளார்கள் என்பதே. 

ஸ்ரீமன் நாராயணனின் 24 ரூபங்களில் ஸ்ரீ தத்தாத்ரேயரும் ஒருவர்.

இவர் ஒரு அவதூதர். ஸ்ரீ விஷ்ணுவின் ஆறாவது அவதாரம் (1.3.11) ஸ்ரீ தத்த அவதாரம் என்று பாகவதம் குறிப்பிடுகிறது. ஸ்ரீ விஷ்ணு குருவாகி அருள் புரிந்த ஓர் உன்னத அவதாரம் ஸ்ரீ தத்தாத்ரேயர் அவதாரம்.

த்ரிபுரா ரஹஸ்யம், அவதூத கீதை, தர்சனோபநிஷத், அவதூதோபநிஷத் இவரை பற்றி மிக விரிவாக விளக்குகின்றது. மார்க்கண்டேய புராணமும், ஸ்ரீ மத் பாகவதமும் இவரின் மகிமைகளை எடுத்தியம்புகிறது. ஸ்ரீ மத் பாகவதத்தில் (11-7,8,9) யயாதியின் புதல்வரான யதுவிற்கும் ஓர் அவதூதர்க்கும் (ஸ்ரீ தத்தர்) நடக்கும் சம்பாஷணைகள் 'யது வாத சம்வாதம்' என்று அழைக்கப்படுகிறது.

ஸ்ரீ தத்தர் நித்யம் ஸந்நிஹிதோ ஹரி: என்ற கூற்றுக்கிணங்க அருகில் இருந்து காட்சி தந்து அனுகிரஹிப்பவர். ஆனால் நம்மால் அவரின் மாயையை புரிந்து கொண்டு அவரின் முழு கடாக்ஷத்தை பெறுவது மிகவும் கடினம்.

நித்ய சிரஞ்சீவி.

தத்தரின் பாத தூளியிலிருந்து யதுவும், கார்த்தவீர்யார்ஜுனனும் தோன்றினார்.

ஸ்ரீ தத்தரின் தோற்றம்

அவதூதர். கௌபீனம் அணிந்து சாம்பலை உடலில் பூசி கொண்டு ஏகாந்த ஸ்வரூபியாக, முற்றிலும் பற்றற்றவர். எப்பொழுது எங்கு இருப்பார் எங்கு செல்வார் என்று அனைவராலும் அறியப்பட முடிய யோக மாயா  ஸ்வரூபி ஸ்ரீ தத்தாத்ரேயர். பசு, நான்கு நாய்கள் புடைசூழ, கரங்களில் திரிசூலம், சங்கு சக்கர ஸ்வரூபியாய், சாம்பல் பூசிய தேகத்துடன், பிட்சை பாத்திரம் ஏந்தி, ஜெபமாலையுடன் அபார தேஜஸுடன் வீற்றிற்றுப்பார்.

பசு/காமதேனு - கேட்பவற்றை அள்ளித்தரும் காமதேனுவை பக்தர்களின் மனோபீஷ்டங்களை பூர்த்தி செய்பவர். தர்ம ரூபம்.

நான்கு நாய்கள் - நான்கு வேதங்களை குறிக்கும்.

திரிசூலம் - அறியாமை, அகந்தையை அழிப்பதை குறிக்கும்.

சுதர்சன சக்கரம் - முக்காலமும் அறிந்தவர். ஆதியும் அந்தமும் இல்லாத விஷ்ணு ஸ்வரூபம் என்பதை உணர்த்தும்.

சங்கு - உறங்கும் ஆத்மாவை பிரணவ ஒலியாகிய ஓம்காரதத்துடன் தட்டி எழுப்பும்.

சாம்பல் - செல்வம், ஆடம்பரம், அகந்தை, புகழ், ஆணவம் அனைத்தும் ஒருநாள் அழியும் நிலையற்ற தன்மையுடையவை என்பதை உணர்த்தும்.

பிட்சை பாத்திரம் - தனக்கென்று ஏதும் சேர்க்காமல் இருப்பதை பகிர்ந்துண்டு உண்ண வேண்டும் என்பதை உணர்த்தும்.

ஜெபமாலை - நித்யம் பகவானின் நாம ஜெபத்தில் ஈடுபட வேண்டும் என்பதை உணர்த்தும்.

ஸ்ரீ தத்தர் கலியுகத்தில் எடுத்த அவதாரங்கள் ஐந்து:

ஸ்ரீ பாத ஸ்ரீ வல்லபர்

ஸ்ரீ நரசிம்ஹ ஸரஸ்வதி

ஸ்ரீ சுவாமி சமர்த்தர் (எ) அக்கல்கோட் மஹராஜ்

ஸ்ரீ மாணிக் பிரபு மஹராஜ்

ஸ்ரீ ஷீர்டி சாய் பாபா

'டேம்பே ஸ்வாமி' என்று அழைக்கப்படும் 'ஸ்ரீ வாசுதேவானந்த ஸரஸ்வதி ஸ்வாமிகள்' 3500 ஸ்லோகங்கள் மற்றும் 64 அத்தியாயங்கள் கொண்ட ஸ்ரீ தத்த புராணம் படைத்தார்.

2000 ஸ்லோகங்கள் அடங்கிய 'குரு சரித்திரம்' என்னும் நூலும் இவரின் முதல் இரண்டு அவதாரங்களான 'ஸ்ரீ பாத ஸ்ரீ வல்லபர்' மற்றும் 'ஸ்ரீ நரசிம்ஹ ஸரஸ்வதி' மகிமைகளை பற்றி விரிவாக பேசுகிறது.

ஸ்ரீ தத்தர் தனது யோகா மாயையால் 15 தத்வங்களாலான உலகை படைத்து தான் 16ஆவது தத்வமான புருஷனாக ஆனார்.

இவரின் லீலா விநோதங்களை அறிந்து கொள்வது மிக மிக கடினம் ஏனென்றால் முற்றிலும் மாய தோற்றத்துடன் வெவ்வேறு ரூபங்களில் தனது உண்மையான ஸ்வரூபத்தை மறைத்து மாய வடிவத்துடன் விளங்கும் குரு. பூர்வ ஜென்ம புண்ணிய குவியல் இருந்தால்தான் இவரை வழிபடும் பாக்கியம் நமக்கு கிடைக்கும்.

ஏகநாதர், ஸ்ரீ சமர்த்த ராமதாஸ் ஸ்வாமிகள், தத்தோத்பவா, அலர்கன், விஷ்ணு தத்தர், சத்ருஜித் மற்றும் பல பாகவதோத்தமர்கள் இவரின் தரிசனம் பெற்றனர்.

ஸ்ரீ தத்தரின் 24 குரு மார்கள் :

பூமி, காற்று, ஆகாயம், நீர், நெருப்பு, சந்திரன், சூரியன், புறா, மலைப்பாம்பு, கடல், வீட்டில் பூச்சி, தேனீ, யானை, தும்பி, மான், மீன், பிங்கலை என்னும் வேசி, அன்னப்பறவை, பாலகன், குமாரி, வேடன், சர்ப்பம், சிலந்திப்பூச்சி, ஈ.

சீடர்கள்

இவர் ஸ்ரீ பரசுராமரின் தந்தை ஜமதக்னியின் குரு. இவர்தான் ஸ்ரீ பரசுராமருக்கு சாக்த வழிபாட்டின் தத்துவத்தை உபதேசித்த குரு என்று திரிபுர ரஹஸ்யத்தின் 'மஹாத்ம்ய-ஜ்ஞான கண்டங்கள் விளக்குகின்றன. இதன் அடிப்படையில் பரசுராமர் கல்ப சூத்திரங்களை தொகுத்து ஸ்ரீ வித்யா பூஜைக்கான முதல் விளக்க நூலை படைத்தார்.

ஆறாவது சாக்ஷுஷ மன்வந்த்ரத்தில் தோன்றிய ப்ரஹ்லாதருக்கு குருவாக இருந்து ‘ஆத்ம தத்வத்தை’ உபதேசித்தார்.

க்ருத வீர்யனின் புதல்வனான 27 ஆவது சதுர்யுகத்தில் தோன்றிய கார்த்தவீர்யார்ஜுனனுக்கு ‘அஷ்டாங்க யோகத்தை’ உபதேசித்தார்.

இவரின் அனுகிரஹத்தால்தான் ஸ்ரீஆதிசங்கரர் கைலாசத்தில் இருந்து யோகமார்க்கத்தில் சென்று ஈசனிடம் பஞ்ச லிங்ககளைப்பெற்று 'சௌந்தர்ய லஹரி' பெற்றார் என 'ஸ்ரீ சங்கர விஜயம்' கூறுகிறது.

ஸ்ரீ தத்தர் எழுந்தருளியிருக்கும் திவ்ய ஸ்தலங்கள்:

அத்ரி அனுசுயா குடில், மாஹூர க்ஷேத்ரம், கரவீர க்ஷேத்ரம், ந்ருசிம்ஹவாடீ, ஒளதும்பர க்ஷேத்ரம், பீட்டாபுரம், அக்கல்கோட், கானகாபூர், மாணிக் நகர், காரஞ்சா, குருவபுரம், நாசிக், பட்காம்வ், சேந்தமங்கலம், ஸ்கந்தகிரி, சேங்காலிபுரம், கணபதி சச்சிதானந்த தத்த பீடம் மற்றும் பல.

ஸ்ரீ தத்தாத்ரேயர் தியான ஸ்லோகம் :-

மாலகமண்டலு தர கரபத்மயுக்மே |

மத்யஸ்த பாணியுகளே டமருத்ரிசூலம் |

அத்யஸ்த ஊர்த்வ கரயோ : சுப சங்க சக்ரே |

வந்தே தமத்ரி வரதம் புஜ ஷட்க யுக்தம்||

 

ஸ்ரீ தத்தாத்ரேயர் காயத்ரி

ஓம் தத்தாத்ரேயாய வித்மஹே

யோகீஸ்வராய (அத்ரி புத்ராய) தீமஹி

தன்னோ தத்த ப்ரசோதயாத் ||

ஸ்ரீ தத்தாத்ரேயரைத் தரிசிக்க :-

யதுகுலோ வனிகம் வௌஷட் ||

இந்த மந்திரத்தை இரவில் படுக்கையில் அமர்ந்தபடியே ஜபித்து வர ஸ்ரீ தத்தாத்ரேயரை தரிசிக்கலாம்.

சந்தானபாக்கிய_ப்ரத (குழந்தை வரம் தரும்) ஸ்ரீ தத்தாத்ரேய மந்திரம்:

தூரிக்ருத பிஸாச்சார்த்தி ஜீவயித்வம் ம்ருதம் சுதம்|

யோபுவபிஷ்டதா பாது ச ந: சந்தான விருத்தி க்ருத்||

இந்த மந்திரத்தை வியாழக்கிழமை குருஹோரையில் வெண்ணையில் மந்திரித்து உண்டு வர விரைவில் பாக்கியம் கிட்டும்.

ஸ்ரீ தத்தரின் அவதார கதைகள் கேட்பவரையும், சொல்பவரையும் பாவங்களிலிருந்து மீட்டு, பற்றற்ற பரம நிலையை அளித்து முடிவில் மோக்ஷ சாதனையை அளிக்கும் வல்லமை கொண்டது.

 

ஸ்ரீ மானிக் பிரபு மஹராஜ் மஹாசமாதி தினம் - 29-11-2020

  

ஸ்ரீவத்ஸ கோத்ரம் தேசஸ்த ரிக்வேதி ப்ராஹ்மண தம்பதியரான ஸ்ரீ மனோஹர நாயக ஹரகுடே, ஸ்ரீ பய தேவி, தொடர்ந்து 16 வருடங்கள் குரு சரித்திரத்தை பாராயணம் செய்ததன் பலனாக, குரு தத்தாத்ரயரே நேரில் காட்சி அளித்து தானே அவர்களுக்கு மகனாக பிறப்பதாக உறுதியளித்து, மகாராஷ்டிர மாநிலம், கல்யானுக்கு அருகில் உள்ள லத்வந்தி என்னும் கிராமத்தில் டிசம்பர் 22, 1817 அன்று (மார்கஷீர்ஷா பூர்ணிமா - தத்த ஜெயந்தி, ஷாகா 1739 ஈஸ்வர நாம சம்வஸ்தரா) ஆண்டு பிறந்தார். இவர் பிறந்த உடன் அநேக சுப சகுனங்கள் தோன்றின.

இவர் தத்தாத்ரேயரின் நான்காவது திரு அவதாரமாக கருதப்படுகிறார்.

இவரின் பிறந்த ஊரான லத்வந்தியில் உள்ள ஸ்ரீ மானிக் பிரபுவின் அழகிய குழந்தை ரூபம்

மானிக் பிரபுவின் முஸ்லீம் பக்தர்கள் அவரை மெஹபூப் சுபானியின் அவதாரமாக மதித்தனர். அதே நேரத்தில் அவரது லிங்காயத் பக்தர்கள் அவரை பசவண்ணாவின் ஒரு வடிவமாக பார்த்தார்கள்.

இவருக்கு தாதாசாகேப் என்று ஒரு மூத்த சகோதரரும், தத்யா சாஹேப் என்று அழைக்கப்படும் ஒரு தம்பியும், சிமனாபாய் என்ற சகோதரியும் இருந்தனர்.

தத்தரின் அவதாரமாக பிறந்த இந்த குழந்தைக்கு ஓர் அபூர்வ சக்தி இருந்தது. இக்குழந்தைக்கு எதிரில் நின்று யாராகினும் தனது பிரச்சனைகளை கூறினால் அதற்கு உடனடி நிவாரணம் பெற்று பல்லாயிரக்கணக்கான மக்கள் நிம்மதி பெற்றனர்.

இவருக்கு ஏழு வயதில் பெற்றோர் உபநயனம் செய்வித்தனர். இவர் செய்வீக குழந்தை அல்லவா ஆதலால் இவர் அனைத்து மந்திரங்களையும் ஓதி பண்டிதர் அனைவரையும் வியப்பில் ஆழ்த்தினார்.

படிப்பில் சிறிதும் நாட்டமின்றி இவர் திரிந்ததை அறிந்த பெற்றோர் தனது மகனை தாய் மாமா இல்லத்திற்கு அழைத்து சென்று ஓர் உத்தியோகத்தில் சேர்க்கும் படி கூற, அவரும் சேர்த்து விட, அந்த வேலையிலும் நாட்டம் இன்றி சிறிது மனக்கசப்போடு தாய் மாமா வீட்டில் இருந்து வெளியேறினார்.

இவர் புரிந்த லீலா வினோதம் சற்று வித்தியாசமானது. ஓர் பக்தனுக்கு புலியின் உருவில் காட்சி அளித்து அந்த க்ஷணம் முதல் அனைவராலும் 'மானிக் ப்ரபு' என்று அழைக்கப்பட்டார். ஹனுமான் ஆலய பூஜாரிக்கு தத்தரின் வடிவில் காட்சி அளித்தது கல்யாண் நகரில் காட்டு தீ போன்று பரவி இவர் தத்தரின் அவதாரம் என்ற உண்மை அனைவருக்கும் தெரிந்து இவரிடம் ஆசி பெற வந்தனர்.

காசி, பண்டரிபுரம், பரளி வைத்தியநாதர், பீதார் மற்றும் பல புண்ணிய தலங்களுக்கு சென்று மக்களிடம் இறை நம்பிக்கையை வளர்த்தார்.

தனது பக்தர்களின் பல்வேறு வேண்டுதல்களையும், துன்பங்களையும், வேதனைகளையும் நீக்கினார். அனைத்து சமூகங்களும் அவரை மதித்ததால் அவருக்கு 'சகலமாதாச்சார்யா' என்ற பட்டம் வழங்கப்பட்டது. ஷீர்டி சாய் பாபாவை போன்று ஹிந்து-முஸ்லீம் பக்கதர்களிடையே ஓர் பாலமாக விளங்கினார்.

 

அற்புதங்கள்

 

v  இறந்த சிறுவனை தனது சக்தியால் உயிர்ப்பித்தார்.

v  கர்ப்பிணி பசுவை அடித்த முரடனுக்கு அந்த பசுவின் மூலம் தக்க பாடம் அளித்து திருத்தினார்.

v  விட்டல் பாபாவான பண்டரிநாதனை தொட்டு வணங்க முற்பட்டபொழுது பூஜாரி அவரை தடுக்க உடனே பண்டரிநாதனின் கழுத்தில் உள்ள மாலை மானிக் பிரபு கழுத்தில் விழுந்து ஸ்ரீ விட்டலனாகவே காட்சி அளித்தார்.

v  பக்தர்களுடன் பயணம் செய்கையில் கொடிய விஷ நாகம் தென்பட அதன் பாஷையில் பேசி அதனை போக வைத்தார்.

v  மக்களிடையே இறை நம்பிக்கையையும், மத ஒற்றுமையையும் வளர்க்க அயராது பாடுபட்டு அதில் அபார வெற்றியும் பெற்றார். இவரின் காலத்தில் ஸ்ரீ தத்தாத்திரேய வழிபாடு மிகவும் பிரபல்யமானது.

மராத்தி, கன்னடம், இந்தி, உருது மற்றும் சமஸ்கிருதம் போன்ற பல்வேறு மொழிகளில் ஏராளமான பஜன்கள் மற்றும் பதங்களை ஸ்ரீ பிரபு இயற்றினார்.

 

 முக்தி

ஹூம்னமாபாத் என்னும் மானிக் நகர் சென்று ஆஸ்ரமம் அமைத்து 1865 ஆம் ஆண்டு (29-11-1865) குழிக்குள் அமர்ந்து கொண்டு ஜீவ சமாதி அடைந்தார். இவரின் ஆத்மா இவரின் மூல ரூபமான ஸ்ரீ தத்தரிடம் சென்று கலந்தது.

ஹுமனாபாத் பேருந்து நிலையத்திலிருந்து 2 கி.மீ தூரத்திலும், பிதாரில் இருந்து 51 கி.மீ தூரத்திலும் ஸ்ரீ மானிக் பிரபு கோயில் அமைந்துள்ளது.